İstifadə şərtləri

Nefis MMC · VÖEN 1906837672

Nə satırıq

Hər qutu sifariş üzrə hazırlanır: sizin şəkliniz, sizin sözlərinizlə. Qutunun içinə seçdiyiniz şokolad qoyulur. İstəyinizə görə hədiyyə qablaşdırması, polaroid məktub və canlı şəkil (telefonla açılan video) da əlavə olunur.

Bəzi dizaynlarda şəklin yerinə gecə səmasını seçmək olur: seçdiyiniz tarixdə, seçdiyiniz yerin üstündəki səma çap olunur. Polaroid məktub və canlı şəkil ayrıca da sifariş edilə bilər.

Şirkətlər üçün loqolu qutular ayrı qaydada, sorğu ilə hazırlanır.

«Lokasiya» dizaynlarında seçdiyiniz yerin küçələri çap olunur. Xəritə məlumatları OpenStreetMap-dəndir və ODbL lisenziyası ilə paylaşılır; bu qeyd həm saytda, həm də qutunun üzərində göstərilir.

Sifariş necə verilir

Sifariş vermək üçün əvvəlcədən hesab açmağa ehtiyac yoxdur: ad, e-poçt və Azərbaycan nömrəsi kifayətdir. Hesabı sifarişlə birlikdə sizin üçün biz açırıq, şifrəni sonra özünüz seçirsiniz. Bir nömrə ilə bir hesab olur.

• Dizaynı seçirsiniz, şəklinizi yükləyir və yazıları yazırsınız. Hər yazı sahəsinin öz simvol həddi var və nə yazılıbsa, o da çap olunur.
• Saytda aktiv şokolad varsa, qutunun içinə şokolad seçmək məcburidir.
• Bir dizaynı 1-dən 20 ədədə qədər sifariş etmək olar — səbətdə sayı dəyişə bilərsiniz.
• Son səhifədə çatdırılma üsulunu, ünvanı, günü, vaxt aralığını və telefonu yazırsınız.

Yekun məbləği sifarişi göndərməzdən əvvəl görürsünüz. Sifariş göndəriləndən sonra ödəniş səhifəsinə keçirsiniz.

Qiymət nədən ibarətdir

• Dizaynın öz qiyməti.
• Seçdiyiniz şokolad — qiyməti seçim zamanı göstərilir.
• Hədiyyə qablaşdırması, polaroid məktub və canlı şəkil — yalnız seçsəniz.

«Təcili hazırlansın» haqqı bütün sifariş üçün bir dəfə alınır, hər qutuya görə deyil. Çatdırılma ayrıca hesablanır. Bütün qiymətlər manatladır.

Çatdırılma

• Qapıya çatdırılma — 5 ₼. Yalnız Bakı daxilində
• Poçt ilə çatdırılma — 5 ₼. Azərbaycanın istənilən poçt şöbəsinə
• Metroya çatdırılma — pulsuz. Seçdiyiniz Bakı metro stansiyasında təhvil

Qapıya çatdırılma yalnız Bakı daxilindədir və yeri xəritədə özünüz seçirsiniz. Sifariş verilən andakı üsul və qiymət sifarişin içində saxlanılır: sonra qiyməti dəyişsək, sizin sifarişinizə təsir etmir.

Nə vaxt hazır olur

Hər qutu əl ilə hazırlanır, ona görə həmin gün təhvil verilmir. Hazırlanma müddəti 2 gündür; ən erkən mümkün tarix son səhifədə yazılır və təqvimdə ondan əvvəlki gün seçilmir.

Günü və vaxt aralığını özünüz seçirsiniz. «Təcili hazırlansın» sifarişi növbədənkənar hazırlayır; daha erkən gün lazımdırsa, sifarişdən sonra bizə yazın.

Ödəniş

Hansı ödəniş üsullarının açıq olduğunu sifarişin ödəniş səhifəsində görürsünüz. Kartla ödəniş epoint.az-ın qorunan səhifəsində aparılır — kart məlumatları bizdə saxlanmır. Köçürmə ilə ödəyəndə qəbzi həmin səhifəyə yükləyirsiniz və biz onu yoxlayırıq.

Ödənişi başlamış sifariş bir müddət «yoxlanılır» kimi qalır — bu vaxt ikinci dəfə ödəməyin. Ödənişi olmayan və qəbzi göndərilməyən sifariş bir gündən sonra ləğv edilə bilər; sifarişi yenidən vermək olar.

Sifarişin gedişi

• Ödəniş gözlənilir — Sifarişiniz qeydə alındı. Ödəniş gözlənilir.
• Çek yoxlanılır — Çekinizi aldıq, ödənişi yoxlayırıq.
• Gözləmədə — Sifarişiniz qeydə alındı və növbəyə düşdü.
• Təsdiqləndi — Ödəniş təsdiqləndi, sifarişiniz hazırlanır.
• Hazırdır — Sifarişiniz hazırdır, kuryer yola düşəndə sizinlə əlaqə saxlayacaq.
• Tamamlandı — Sifarişiniz hazırdır və təhvil verildi. Nuş olsun!
• Ləğv edildi — Sifarişiniz ləğv edildi.
• Vəsait qaytarıldı — Vəsaiti geri qaytardıq. Məbləğ bankınızdan asılı olaraq 1–7 iş gününə kartınıza düşəcək.

Statusu hər zaman «Sifarişlərim» səhifəsində görürsünüz. Status dəyişəndə hesabınızdakı e-poçta məktub göndərilir; məktub gəlməyibsə, spam qutusunu yoxlayın və ya elə həmin səhifəyə baxın.

Dəyişiklik və ləğv

Saytda sifarişi özünüz dəyişmək və ya ləğv etmək düyməsi yoxdur. Nəyisə dəyişmək lazımdırsa — şəkil, yazı, gün, ünvan — bizə mümkün qədər tez yazın. İş başlamayıbsa, birlikdə həll edirik: ya dəyişirik, ya sifarişi ləğv edib yenisini veririk.

Hazır fərdi qutu geri qaytarılmır — o yalnız sizin şəkliniz və sözlərinizlə mövcuddur. Pulun qaytarıldığı hallar «Ödəniş və qaytarma» səhifəsində yazılıb.

Müəllif hüququ

Saytdakı bütün dizaynlar, onların şəkilləri, mətnlər və saytın özü Nefis Şokolad Evinə məxsusdur və müəllif hüququ ilə qorunur. Dizaynlar bizim öz işimizdir.

Qutunu alırsınız — dizaynın hüququnu yox. Dizaynlarımızı surət çıxarmaq, satmaq, başqa məhsulda, çapda və ya reklamda istifadə etmək, habelə onların əsasında oxşar məhsul buraxmaq icazəsiz olmaz.

Bu, xüsusilə başqa mağazalara və onlayn satıcılara aiddir: dizaynlarımızı götürüb öz məhsulu kimi satmaq, kataloqunda yerləşdirmək və ya üzərində kiçik dəyişiklik edib çıxarmaq olmaz. Belə halda hüquqlarımızı qanun yolu ilə müdafiə edirik.

Aldığınız qutunun şəklini sosial şəbəkədə paylaşmaq, hədiyyə etmək və göstərmək tamamilə sərbəstdir — buna sevinirik. Söhbət dizaynın özünün ticarətdə istifadəsindən gedir.

Yüklədiyiniz şəkil isə sizindir: onu yalnız sizin sifarişinizi hazırlamaq üçün işlədirik və icazəniz olmadan reklamda göstərmirik.

Sizin öhdəliyiniz

Yüklədiyiniz şəkli istifadə etmək hüququ sizdə olmalıdır: başqasının şəkli, loqosu və ya müəllif işi üçün icazəniz olduğunu təsdiq edirsiniz. Yazıları yoxlayın — nə yazılıbsa, o çap olunur.

Əlaqə

• Telefon və WhatsApp: +994 99 230 80 50 — Hər gün 10:00–20:00
• Instagram: nefis.az
• E-poçt: info@nefis.az
• Saytın küncündəki söhbət — açıq olanda ora yazdığınız birbaşa bizə düşür.

Şərtlər dəyişə bilər; saytda həmişə son variant göstərilir.